مشهد [1]
زوجة سنعة .. بيتها يفتح النفس مرتب وذوقها في الاثاث ماله مثيل
بس مشكلتها " ماتعرف تطبخ "
مشهد [2]
مديرك او مديرتك وخلونا نقول في البنك اللي تشتغل فيه في يده يرفعك للسماء وفي نفس الوقت يخسف بك !
ثقيل طينه ولايدل التنكيت والذب .. ومستخف دمه بشكل غير طبيعي !
مشهد [3]
جار لكم في الحارة .. ذرب وراعي مواجيب
مايخلى بيته دايم من العزايم والضيوف
بس إنه نشبه الله يهديه ويلزّم عليك حتى لو إنك مشغول !
مشهد [4]
صديق لك يعزك ولايخلي أحد يتكلم عليك في غيبتك وإن غبت اتصل يسأل وينشد عنك
راعي سوالف وجلسته ماتنمل بس عنيد ولايسمع الكلام ومرات تمسك معه ويقلب جو الجلسة فلم مصري شوي تروح تجيب كرتون المناديل من السيارة
مشهد [5]
واحد من أخوانك شبابي ويحترمك ولابغيت انت ولا اهلك شي جابه لكم بنفس طيبه
بس مشكلته من اللي ينقال عنهم لاسولف " لاتكلم مسك خط "
مشهد [6]
واحد من اقاربك وخلونا نقول " عـمـك " على سبيل المثال لا الحصر ..
كـل ماقابلك في مناسبة ( عرس - عزيمة - اخرى )
قالك ابزوجك بنتي ..
انت في كل هالحالات مجبور تسايرهم وتجاملهم لان الجوانب الايجابية هنا اكثر
فالزوجة المثالية لو كان طبخها لك عليه فهو شي تقدر تتغلب على هالمشكلة مع الايام
والمدير مثل مايعرف اخونا في صمتي جروح اهم شي عنده العلاقات بعدين شغلك وجهدك !
انت هنا مجبور تسايره وتاخذه على قد عقله .. لانك لو بينت له إنه سامج فصدقني ماراح تكمل سنة العقد في نفس الفرع
الجار مثل ماذكرت ايجابياته تغلب على السلبيات مضياف وهذي صفة اشوفها بدت تقل حتى إنه نادراً يكون في حارة كاملة شخص يعرف بهالصفة الناس صارت تهرب من العزايم اجل وشلون لو هي اللي تعزم .. انا اتكلم بشكل عام ولا احصرها في منطقة او مدينة معينة ، هالجار لو كنت فاظي وماوراك شي وعزمك لازم تلبي دعوته بناءاً على القول العربي
( مايرد الكريم الا اللئيم ) <- اقرب مخرج :D
الصديق اللي جوه كئيب في بعض الاحيان هذا شغلته بسيطة خله يسحب على البنت اللي يكلمها وخلصنا ..
لأن من جد الاصدقاء اللي تلقى فيهم هالصفات صاروا اندر من الجار الكريم
لان انتشر هالايام صداقة المصالح وكما تسمى " fair - weather friend "
يعني بالعامي إنسان مايجي لوجه الله وياكثرهم في هالوقت ..
الاخو اللي يمسك خط هذي مشكلة واحد من العيال ودايم يقول انا إنسان مااحب اسمع سوالف ورا بعض هذا طبعه من يوم كان صغير إنسان هادي ولايحب الصجة ( الازعاج لغير الناطقين بالالمانية ) .. وصراحة حاولت ابين له إن أخوه مافتح له قلبه الا لانه يعتبره قريب منه
بس مافاد العذر حسيت إنه يقول في نفسه النار ماتحرق الا رجل واطيها ..
العم النشبة .. قلتوا لي وش الحل معه !
الله لايحطكم مكاني بس ، مجبور اجامل والله
إذا مارحت زعل علي طويل العمر ( الوالد )
وإن رحت للمناسبة جلس يلمح وإن إنسان اكره التلميح
ومرات يخربها ويقولها كاش ..
المشكلة إن بنته ماتبعد عني كثير ولا الباقين صغار
من كثر الدعاء بقلب صافي وخاشع لخالقه عز وجل
جائني خبراً سعيد بخطوبته إبنته ..
لا استطيع ان اصف فرحتي ولكني أستطيع تشبيهها بفرحة جمهور الهلال بهدف الفوز في مرمى جابليو الياباني من سيرجيو لمشاهدة الهدف اضغط هـنـا
حتى إني بغيت اتكفل باثاث الشقة <- بندر بن محمد على غفلة
انا عن نفسي ممكن اجامل في حالات نادرة جداً ..
بس إني اجامل ( نمام - كذاب ) مستحيل
متى تجاملون .. وش المواقف اللي مستحيل تجاملون فيها
وإذا ودكم تذكرون مواقفكم مع المجاملات اخذوا راحتكم
منقول لعيونكم
